‘A cannarutizia

S’è sempe ditto, chest’è risaputo,

d’’o puorco quase tutto cunzumammo,

niente se jetta, niente va perduto;

pure sanghe e ppellecchie ce magnammo.

Avite maie pruvato ‘a cutenella

arravugliata e cotta int’o ragù?

È sapurita, cchiù ‘e na brasciulella,

chi l’ha mangiata nun s’’a scorda cchiù!

E nu sasiccio cu ‘e ppatane fritte?

O forze, meglio ancora, cu è friarielle?

E ‘e fecatielle? Na zupp’ ‘e zuffritto?

M’’e ssonno ‘a notte chesti ccose belle.

‘O ddoce p’’o palàto? ‘A tracchiulella!

Mmiscata cu ‘e fasule o int’’a menesta,

o cucenata dint’’a sarzulella,

ve lassa mmocca, nu sapore ‘e festa.

Ma ‘a festa po’ pe ll’uocchie, vuie a’ vedite

ncopp’a na bancarella: ‘o père e ‘o musso!

Si maie l’ìte pruvate, nun sapite

sti ccusarelle comme songhe ‘e lusso.

Chist’ antipasto, vuie ve l’aggarbate

cu sale, pepe e o ‘zuco ‘e nu limone

e si nun site sazie ve magnate,

na spica, ‘e fficurinie e nu mellone.

…Cu mme, che songo nato cannaruto,

‘o Diavolo s’è mmiso mponta ‘e prete:

preciso o sissant’anne, stu curnuto,

m’ha rialato ‘o zucchero, ‘o diabbete.

Me sfotte, me cuffeia, me dà ‘a morte,

me caccia ‘a lengua e dice:  – Guagliunciè,

si vuò campà n’appoco, a zuppa forte,

suonnala solo ‘e notte, siente a mme! –