Divagazioni

Talvolta, nel darvi il Buongiorno, ci piacerà cavare dal teraturo, antichi versi anonimi, di ostinati cantori della bellezza antica. Risentirete parlare di Papele, diminutivo di Raffaele, che in umili, ma appassionate rime, celebrò la sua Musa. 

SCIURE E FRITTURE

’A primma puesia ce la screvette

propetamente sotto miezejuorne,

all’ora d’ ’a marenna, tutte ’o sanno,

quanno ’a famma se sceta,

 e ’o stommaco è vacante, ll’appetito

te saglie ‘mmocca e ‘o vierzo,

scorre preciso, sempe cchiù cundito.

‘Nu foglio giallo ’e carta ’e pisciavinnolo,

buono pe ’ncarta’ o pesce appena asciuto ’a mare,

nu lappese appuntuto ’e mastodascia

e po aspettaie che ’a parola nascesse

fresca, zucosa, sapurita comm’ ’a cozzeca chiena

che tu arape cu ’na ponta ’e curtiello

e ce spriemme pe coppa nu limone.

E che me fidaie ’e dicere:

chell’era  ’na canzona appassiunata,

addo mmiscaie musica, addore, core, ardore,

‘o meglio sciore, cielo, mare, sole,

chitarre, manduline, luna e stelle,

nu poco ’e gelusia, nu bellu squaso

e m’azzardaie: si me lo permettete

v’azzecco nu vasillo ’mpont’ o  naso.

Po saglierò sicuro ’n Paraviso,

se degno mi facite di darvelo sul musso o sul bel viso.

Ce stevano, sicuro, cierti cancellature e pure ’e segne

’e qualche lacremella ’e sentimento,

che m’era sciuliata a guccetella.

Po me sbattette forte ’o core ’mpietto,

quanno astrignette ’o ruotolo

cu ‘nu filo perfetto ’e lana rossa,

buon’ apparato cu nu nurghillo overo aggraziato.

’Na cumpagnella me purtaie ’a risposta,

sincera, lustra comm’a ’na giarretella ‘e vino janco,

chiena ’e fell’ ’e percoche verace c’ ’o pizzo,

che nun so’ troppo toste o troppo mosce.

“ Carmusina s’è fatta leggere la priggiata vosta,

pecchè è ‘na zita che se cura ’a vista.

Suspiranno speruta, po s’’he allisciat’ ’a carta

e ha ditto: vanno bbone pe me tutte sti cose,

ma m’è rimasto nu vulio ’nganna. Stu foglio, fatto a cuoppo,

m’o so’ sunnato chino chino ‘e tante piscetiell’ ’e paranza.

Aggio sentuto’ ’addore, pe tutt’ ’a casa, addo s’è spaso,

v’’o giura, sull’onore’,na figliulella esperta di frittura.

Aggio pensato: quant’è delicata:

‘o pesce frisco vale cchiù ’e na rosa.

Sta figliola è ’na femmena ’e sustanza;

’o meglio sciore ’e maggio nun s’appara

cu a fritttura cchiù rara, chella ‘e paranza.

Papiluccio

’o bello ’e Via Sapienza

 27 Settembre 2020