‘Na luggetella ‘e tantu tiempo fa

Quanta palumme ‘ncopp’ ‘a luggetella,

tanta rusèlle e quacche pianta ‘e viole,

na bagnarola sott’ ‘a funtanella

e na buatta cu ‘a vasenecola.

Mammà ca s’allargava ‘o ppoco ‘e lana

pè  dint’e materazza stise o sole,

‘o tiempo ca scurreva chianu chiano,

n’auciello che cantava ‘int ‘a caiòla.

Cagnavano ‘e culore ogne staggione

pe’ copp ’a chella loggia doce e antica

a vierno, steva appiso nu mellone,

‘o mese Austo, nu panaro ‘e fiche.

E dint’a na culata spasa o sole,

steva tanta fatica ‘e mamma mia,

nun lle pesava, era na figliola

mo ‘ vecchiarella, che malincunia.

Songhe ricorde ‘e chella giuventù

‘e quanno ‘a vita nun ce deva pressa,

quatt’ore s’aspettava p’’o rragù,

ogge se vo’ fa tutto ampressa ampressa.

Addò sta cchiù ll’addore d’’o magnà

ca sesenteva pure ‘a miez ‘a via…

ma ‘a luggetella mia sta sempe ‘lla,

‘nzieme e ricorde chine ‘e nustalgia.